اردوئے معلیٰ

Search

آپ کے عشق میں ہستی کا فنا ہو جانا

لوگ کہتے ہیں اسے حق کا ادا ہو جانا

 

یہ کرم کم تو نہیں میرے خدا کا مجھ پر

نعت کہنے کا ہنر پل میں عطا ہو جانا

 

بس اسی بات پہ محشر میں وہ راضی ہوں گے

اُن کی خاطر مرا دنیا سے خفا ہو جانا

 

آپ کے ہجر میں جل اُٹھنا مرے سینے کا

آپ کے ذکر سے پھر اس کی دوا ہو جانا

 

نعت کہتے ہوئے کھو جانا بیادِ آقا

میرے اطراف میں طیبہ کی فضا ہو جانا

 

نعت کہنے کے لیے جب بھی ارادہ باندھوں

ساتھ ماحول کا بھی محوِ ثنا ہو جانا

 

میری ہر بات کو یا رب یہ قرینہ دے دے

میرے ہر لفظ کی خواہش ہے دعا ہو جانا

 

یہ عقیدت یہ محبت بھی کرم ہے اُن کا

دیکھ کر روضہ مرے دل کا فدا ہو جانا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ