اردوئے معلیٰ

احسانِ حضور

سب سے بڑھ کر آپ کا احسان ہے ہم پر حضور
آپ نے ہم کو بتایا ہے کہ خالق کون ہے؟
نعمتیں دیتا ہے ہم کو کون سا منعم یہاں!
پالتا ہے کون ہم لوگوں کو، رازِق کون ہے؟
سب سے بڑھ کر آپ کا احسان ہے ہم پر حضور
دولتِ قرآں بھی ہم کو آپ کے صدقے ملی!
علم و عرفاں کے خزانوں تک رسائی ہو سکے!
وہ بصیرت بھی اولی الابصار کو تقسیم کی!
سب سے بڑھ کر آپ کا احسان ہے انسان پر
نور کی دنیاؤں کا آیا اسے پختہ یقیں!
ہم کلامی کا شرف بخشا جو خالق نے اسے
درمیاں میں آئی ذاتِ رحمۃُ للعالمیں!
رحمۃُ للعالمیں کے فیض نے بخشا اسے
اِک جہانِ نور و نکہت ان خلاؤں میں عزیزؔ
مل گیا رَبّ آدمی کو، اس جہاں میں بے گماں
جب ہوئی پہچان رَبّ کی، مل گئی ہر ایک چیز!
یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ