’’الٰہی مُشکلوں میں سب کے دل کا آسرا تُو ہے‘‘
پڑی ہے جب کوئی مشکل ، مرا مُشکل کُشا تُو ہے
تُجھے محبوب ہے بندوں کا تُجھ سے ہی طلب کرنا
اگرچہ مشکلیں بندوں کی مولا جانتا تُو ہے
ترے محبوب کے در پر تبھی دامن پسارا ہے
کہ تُو مُعطی وہ قاسم ہے سبھی کرتا عطا تُو ہے
تِرا فرمان ہے مولا !، نہ ہوں مایُوس رحمت سے،
مریضِ لا دوا کے ہر مَرَض کی بس دوا تُو ہے
مرے عیبوں کو محشر میں مرے مولا ! چھپا دینا
کہ پردہ سب کے عیبوں پر ہمیشہ ڈالتا تُو ہے
جلیلِ بے نوا کے بھی غموں کو ٹال دے یا رب
کہ صدقہ اپنے پیارے کا غموں کو ٹالتا تُو ہے
