اردوئے معلیٰ

Search

آنکھ میں ہی ٹھہر گیا دریا

جونہی سر سے اتر گیا دریا

 

آنکھ کب تک سمیٹ کر رکھتی

ایک پل میں بکھر گیا دریا

 

کون اترا ہے تشنگی لے کر؟

ہائے لوگو! کدھر گیا دریا؟

 

شہر والوں میں شور برپا تھا

چپکے چپکے گزر گیا دریا

 

باعثِ بے گھری بنا یارو

جانے کس کس کے گھر گیا دریا

 

رات آنکھوں میں تھا قیام پزیر

اور وقتِ سحر گیا دریا

 

کتنا خاموش ہو گیا دیکھو

جانے کیسے سدھر گیا دریا

 

پیاس جس کی تلاش میں گم تھی

زینؔ اُس کے شہر گیا دریا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ