اردوئے معلیٰ

Search

اپنے ہر درد کا درمان بنائے رکھا

غم اک ایسا تھا کہ سینے سے لگائے رکھا

 

پاسِ ناموسِ مسیحا تھا مجھے درپردہ

زخمِ جاں سوز کو مرہم سے بچائے رکھا

 

ایک اندیشۂ ناقدریِ عالَم نے مجھے

عمر بھر چشمِ زمانہ سے چھپائے رکھا

 

کبھی جانے نہ دیا گھر کا اندھیرا باہر

اک دیا میں نے دریچے میں جلائے رکھا

 

دیکھ کر برہنہ پا راہ کے کانٹوں نے مجھے

رشکِ گلشن مرے رستے کو بنائے رکھا

 

اصل کردار تماشے کے وہی لوگ تو تھے

وقت نے جن کو تماشائی بنائے رکھا

 

دیکھ سکتا تھا بہت دور تک آگے میں ظہیرؔ

جب تک اِن شانوں پہ بچوں کو اٹھائے رکھا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ