اک آدھ روٹی کے واسطے کیسے کیسے چکر چلا رھا ھُوں

اک آدھ روٹی کے واسطے کیسے کیسے چکر چلا رھا ھُوں

مِرے خُدا ! تُو تو جانتا ھے مَیں جس طرح گھر چلا رھا ھُوں

 

تُمہارے پیروں سے جو چُھوئے تھے وہ مَیں نے جیبوں میں بھر لیے تھے

طلائی سِکّوں کی جگہ مَیں آج بھی وہ کنکر چلا رھا ھُوں

 

تُمہی بتاؤ، تمہارے دل پر چلے بھی کیسے مِری محبت ؟

یہ گہرے پانی کی ناؤ ھے اور مَیں سڑک پر چلا رھا ھُوں

 

اِسی لیے تو مِری غزل کی شراب بِکتی ھے بےتحاشا

یہ مَے کدہ مَیں تُمہاری آنکھوں سے مِل مِلا کر چلا رھا ھُوں

 

جمال و ثروت کی شاعری پڑھ کے اور کیا روزگار مِلتا ؟

سو ایم اے اُردو میں اوّل آکر بھی آج اُوبر چلا رھا ھُوں

 

نتیجہ جو بھی ھو جنگ کا لیکن اس حقیقت کی داد تو دو

کہ مَیں قلم کو تمہاری تلوار کے برابر چلا رھا ھُوں

 

تبھی تو ملّاحوں کا قبیلہ ھُوا ھے میرے لہُو کا پیاسا

یہ سارے کشتی چلانے والے ھیں، مَیں سمندر چلا رھا ھُوں

 

یہ لوگ یُوں اپنے مسئلوں کے تمام حل مُجھ سے پُوچھتے ھیں

کہ جیسے مَیں آج کل زمیں پر خُدا کا دفتر چلا رھا ھُوں

 

ھم ایک اُجڑے ھوئے کلیسا میں روز مِلتے ھیں چُھپ چُھپا کر

وہ ایک مندر چلا رھی ھے، مَیں ایک مِنبَر چلا رھا ھُوں

 

مَیں اپنی فہرستِ دوستاں سے جھٹک رھا ھُوں مُنافقوں کو

یہ سارے ناسور خُود ھی پالے تھے، خود ھی نشتر چلا رھا ھُوں

 

مُجھے محبت کی سلطنت ورثے میں نہیں، جنگ سے مِلی ھے

سو مَیں اِسے پچھلے بادشاھوں سے کافی بہتر چلا رھا ھُوں

 

نہ مَیں پیمبر نہ یہ پیمبر نہ کوئی حُکمِ خدا ھے، فارس

مَیں بُھوک کے دُکھ سے اپنے بیٹے پہ آپ خنجر چلا رھا ھُوں

یہ نگارش اپنے دوست احباب سے شریک کیجیے
Share on facebook
Share on twitter
Share on whatsapp
Share on telegram
Share on email

اشتہارات

لُطفِ سُخن کچھ اس سے زیادہ

اردوئے معلیٰ

پر

خوش آمدید!

گوشے

متعلقہ اشاعتیں

مجھ کو شکستِ دل کا مزا یاد آگیا
اب یہاں سب کو محبت ھے، میاں
میں جم سے آ رہا ہوں آستیں چڑھی ہوئی ہے
بزورِ تیرو تُفنگ کر لو
الفاظ ڈُھونڈتا ہے مِرے حسب حال کیا؟
نہیں ہے اپنی تباہی کا کچھ ملال مجھے
اکڑتا پھرتا ہوں میں جو سارے جہاں کے آگے
دشت ِ قضاء میں خاک اُڑاتی حیات کی
صد چاک ہی دامان و گریبان بھلے ہیں
اب کہاں دستِ حنائی ہے کہ جو رنگ بھرے

اشتہارات