اے نبی کے جانثارو! ’’لَا تَقُوْلُوْا رَاعِنَا‘‘
عرض کرنا ان کو ہو تو! ’’لَا تَقُوْلُوْا رَاعِنَا‘‘
گر ضرورت پیش آ جائے تو ’’اُنْظُرْنَا‘‘ کہو
حکمِ خالق ہے یہ سن لو! ’’لَا تَقُوْلُوْا رَاعِنَا‘‘
داستانِ رنج و غم اپنی سنانے کے لیے
جب حضورِ شاہ بیٹھو! ’’لَا تَقُوْلُوْا رَاعِنَا‘‘
نقص کا پہلو نہ جن سے کچھ نکالا جا سکے
ایسے اچھے لفظ بولو! ’’لَا تَقُوْلُوْا رَاعِنَا‘‘
ایسے مبہم لفظ جن میں معنیِٔ تنقیص ہو
مت زباں پر اپنی لاؤ ’’لَا تَقُوْلُوْا رَاعِنَا‘‘
گرچہ نیت میں تمھاری شک نہیں پر مومنو!
لہجۂ اغیار سمجھو ! ’’لَا تَقُوْلُوْا رَاعِنَا‘‘
ہم پہ ازہرؔ کُھل گئی عظمت رسول اللہ کی
جب کہا خالق نے بندو! ’’لَا تَقُوْلُوْا رَاعِنَا‘‘
