بحرِ نورِ ذات ہے کوئے حبیب
اصلِ صد ” تسنیم ” ہے جوئے حبیب
ملکِ مالک پر ہے قابوئے حبیب
کب محب سے ہے من و توئے حبیب ؟
محوِ سیرِ دشتِ اِلہامی رہی
فکر ہے، صد شکر ، آہوئے حبیب
فیض لیتی ہے قمیصِ یوسفی
واہ رے خوشبوئے گیسوئے حبیب
دیکھتے ہیں سب روئے مرضیِٔ رب
دیکھتا ہے رب سوئے روئے حبیب
چاندنی جس نے شبِ اُمّت میں کی
کربلا میں تھا وہ مہ روئے حبیب
حیدر و زہرا ہیں بحرین اور پسر
ایک مَرجان ایک لُؤلُوئے حبیب
جس طرح ہو اِجتماعِ قبلتین
مُتَّصِل ہیں ایسے ابروئے حبیب
اُن سے سیکھی اِنس نے انسانیت
خود خدا ہے واصفِ خوئے حبیب
دامِ پرسش سے رہائی کا سبب
ہے معظم نعتِ گیسوئے حبیب
