ترا قرآن تری ذات کی تصویرِ مبیں ہے

ترا قرآن تری ذات کی تصویرِ مبیں ہے

تری سیرت ترے قرآن کی تنویرِ مبیں ہے

 

ترا قرآن تری سیرتِ اطہر کا قصیدہ

تری سیرت ترے قرآن کی تفسیرِ مبیں ہے

 

ترا قرآن ترے خلق کی تابندہ روایت

تری سیرت ترے قرآن کی تعبیرِ مبیں ہے

 

ترا قرآن تری مہر و محبت کی حکایت

تری سیرت ترے قرآن کی تاثیرِ مبیں ہے

 

ترا قرآن شب و روزِ گرامی کا جریدہ

تری سیرت ترے قرآن کی تشہیرِ مبیں ہے

 

ترا قرآن ترا شیریں و جاں بخش تکلّم

تری سیرت ترے قرآن کی تقریرِ مبیں ہے

 

ترا قرآن ترے دین کا مرقوم صحیفہ

تری سیرت ترے قرآن کی تحریرِ مبیں ہے

 

ترا قرآن تری حکمتِ عالی کی وضاحت

تری سیرت ترے قرآن کی تدبیرِ مبیں ہے

 

ترا قرآن تری شانِ ’’رفعنا لک ذکر ک ‘‘

تری سیرت ترے قرآن کی تکبیرِ مبیں ہے

 

ترا قرآن رہے نورئ بے دل کا مربیّ

تری سیرت مرے آقا مری تعمیرِ مبیں ہے