اردوئے معلیٰ

تلاشِ نقشِ پائے سرورِ دیں میں بسر کرنا

 

تلاشِ نقشِ پائے سرورِ دیں میں بسر کرنا

مدینہ جانے والوں جب مدینے کا سفر کرنا

 

ہے جس کے رخ سے بحرِ نور و نکہت ہر گھڑی جاری

اسی نورِ ہدیٰ کے ذکر میں شام و سحر کرنا

 

غبارِ نقشِ پائے مصطفیٰ مل جائے گر تم کو

جبینِ شوق کے سجدے وہاں بارِ دگر کرنا

 

مواجہ سامنے ہو یا نظر کے سامنے گنبد

تلاوت والضحیٰ کرنا، تلاوت والقمر کرنا

 

خمیدہ سر جھکی نظریں درودِ پاک ہونٹوں پر

ادب سے گنبدِ خضریٰ پہ یوں پہلی نظر کرنا

 

دعائے منظرؔ عاصی ہے مولا میرے نامہ میں

لکھا ہو نعت کے الفاظ کو لعل و گہر کرنا

 

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ