اردوئے معلیٰ

Search

 

توصیف نبی کرنے والے تعریف خدا ہی کرتے ہیں

میلادِ نبی کی محفل میں ہم حمد الہی کرتے ہیں

 

محبوب خدا ان لوگوں کی خود پشت پناہی کرتے ہیں

جو ذکر الہی کرتے ہیں جو حمدِ الہی کرتے ہیں

 

یہ ارض و سما یہ شمس و قمر یہ حور و ملک یہ جن و بشر

ہر وقت زباں سے اپنی بیاں توحید الہی کرتے ہیں

 

منہ ان کا اجالا رہتا ہے دنیا میں لحد میں عقبیٰ میں

اٹھ اٹھ کر اندھری راتوں میں جو یاد الہی کرتے ہیں

 

توحید الہی منزل بابِ نبوی سے کر حاصل

ایمان عطا ہر مسلم کو محبوب الہی کرتے ہیں

 

بخشے کہ نہ بخشے تو یارب ہے فردِ عمل تیرے آگے

خود اپنی بیاضِ عصیاں پر ہم اپنی گواہی کرتے ہیں

 

اسلام مٹانا چاہتے ہیں توحید کے دشمن دنیا سے

برباد انھیں کردے یارب برپا جو تباہی کرتے ہیں

 

اعمال حسن کچھ پاس نہیں یوں عمر بسر ہوتی ہے ضیا

یا نعتِ محمد لکھتے ہیں یا حمدِ الہی کرتے ہیں

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ