اردوئے معلیٰ

Search

تُم احتیاط کے مارے نہ آئے بارش میں

ھمارے ساتھ پرندے نہائے بارش میں

 

کھڑے تھے دونوں طرف پَیڑ چھتریاں لے کر

کہ راستہ نہ کہیں بھیگ جائے بارش میں

 

مَیں اِتنے رنگ بکھرتے نہ دیکھ پاوں گا

خُدارا کوئی بھی تتلی نہ جائے بارش میں

 

چھُپے ھوئے تھے پسِ پیرھن جو شرما کر

وہ انگ رنگ بہت جھلملائے بارش میں

 

بڑا انوکھا رِدھم تھا برستی بُوندوں کا

ھوا نے رات بہت گیت گائے بارش میں

 

گئی رُتوں کی کوئی ایسی بات یاد آئی

نہ پھول پات نہ ھم مسکرائے بارش میں

 

برستے مینہ میں بھی اشکوں کی لَو بلند رھی

یہ وہ چراغ ھیں جو بجھ نہ پائے بارش میں

 

کسی کو آئی نظر کھلکھلاتی قوسِ قزح

کسی نے دیکھے اُداسی کے سائے بارش میں

 

خدا گواہ ہے کہ مَے جیسا لُطف دیتی ہے

تری بنائی ہوئی گرم چائے بارش میں

 

ھم آج بھیگ گئے سر سے پاؤں تک فارس

کسی کے غم نے وہ چھینٹے اُڑائے بارش میں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ