اردوئے معلیٰ

Search

تُو حبیبِ خدا خاتم الانبیاء

تو ہی خیرالوریٰ خاتم الانبیاء

 

فرشِ اقصیٰ پہ سارے نبی مقتدی

آپ ہیں مقتدا خاتم الانبیاء

 

ختم ہوتے ہیں جاکر مراتب جہاں

وہ تری ابتدا خاتم الانبیاء

 

کاش بن جائے میرا یہ قلبِ حزیں

غارِ ثور و حرا خاتم الانبیاء

 

گرمیٔ حشر میں اس گنہ گار کی

لاج رکھنا ذرا خاتم الانبیاء

 

بن کے تیرا رہوں زندگی کا یہی

مقصد و مدعا خاتم الانبیاء

 

ہو شفاعت مرِی اے مرے چارہ گر

جب ہو محشر بپا خاتم الانبیاء

 

آپ آئے تو محشر میں سب نے کہا

مرحبا مرحبا خاتم الانبیاء

 

ہے یہ عاصی نکما جلیلِ حزیں

تیرے در کا گدا خاتم الانبیاء

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ