تیرے ہر اک کمال کو تَفرید گَہ کہوں
گر شرع اذن دے ، تجھے توحید گہ کہوں
دیکھا ہے جس نے ناخنِ پا کے ہلال کو
اس خوش نصیب آنکھ کو میں عید گہ کہوں
بے مثل آئِنہ ! اے جبینِ شہِ عرب !
تجھ کو علومِ لَوح کی تقیید گہ کہوں
اِثبات و مَحو پر تجھے قدرت ہے خطِّ کَف !
تجھ کو شقاوتوں کی میں تَسعید گہ کہوں
تشریحِ لفظِ اوّلِ کُن یوں کروں بیاں
تجھ کو ظہورِ خلق کی تمہید گہ کہوں
اللّٰہ نے کہا تجھے ” بِھُدٰھُمُ اقْتَدِہ ”
کُل اہلِ مَجد کی تجھے تمجید گہ کہوں
گِرہیں کُھلیں گی اس سے ہی بخششِ کی حشر میں
زلفِ دوتا کو کس لیے تعقید گہ کہوں ؟
تسکینِ دل ہے رنج میں اِک مصرعِ رضا
؏’’ حرماں نصیب ہوں تجھے امّید گہ کہوں ‘‘
سونپِیں خدا نے تجھ کو خزانوں کی کنجیاں
دستِ کرم کو جُود کی تحدید گہ کہوں
اہلِ حبش ہوںجس کی عنایت سے رشکِ حور
اس آنکھ کو مُبَیِّضِ تسوید گہ کہوں
اے نقشۂِ جمال و جلالِ خدا ! تجھے
ہر ماسِوا کے نقش کی تردید گہ کہوں
نورِ خدا کے فیض سے ذرّے ہیں رشکِ مہر
ارضِ مدینہ پاک کو خورشید گہ کہوں
تقسیمِ رزق اور شفاعت کی رُو سے میں
دونوں جہان کی تجھے امّید گہ کہوں
ناقہ سوارِ طیبہ مہاروں کو موڑ دے
اب تو میں اپنے گھر کو تِری دید گہ کہوں
انداز اور بھی ہیں اگرچہ بھلے ، مگر
طرزِ رضا کو نعت میں تقلید گہ کہوں
احمد کا مدح گو ہے معظمؔ خدا فقط
ذاتِ محمّدی کو ہی تحمید گَہ کہوں
