اردوئے معلیٰ

جب اوجِ سخن کعبۂ ادراک میں خم ہو

تب جا کے تری مدح میں اِک حرف رقم ہو

 

کیا طرزِ عنایت ہے ترے دستِ سخا کی

اِک بار کریں عرض تو سو بار کرم ہو

 

جس خاک سے ہے روح کا دیرینہ تعلّق

اے کاش اُسی خاک میں یہ جسم بھی ضم ہو

 

احساس میں در آئے ترے خواب کی خوشبو

بے صوت رواں دل پہ ترا نازِ قدم ہو

 

جب پانی میں رُکتا ہی نہیں عکس مسلسل

مستغنی کہاں دید سے پھر دیدئہ نم ہو

 

ترحیب کی تزئین میں تھے کُن کے مظاہر

نقّاشِ حقیقی کا تمھی نقشِ اَتم ہو

 

اُس سمت ہی کھُل جائیں کریمی کے دریچے

جس سمت ہی مائل بہ کرم دستِ نِعَم ہو

 

اظہار میں رکھ دے کوئی امکان کی صورت

اے جانِ جہاں ! ہجر کا احساس تو کم ہو

 

لہرائے جو اِک پَل کو غِنا بار سیادت

یہ سطوتِ شاہی تو ترا عکسِ حشَم ہو

 

کیا اوجِ عنایت پہ ہو وہ یومِ تسلی

وہ آتے ہوں اور جاتا ہُوا آخری دَم ہو

 

مقصودؔ! سرِ شام جو آجائے بُلاوا

واللہ! سحَر کھولے ہُوئے بابِ ارَم ہو

 

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ

اردوئے معلیٰ

پر

خوش آمدید!

گوشے۔۔۔

حالیہ اشاعتیں

اشتہارات

اشتہارات