اردوئے معلیٰ

Search

جب مدینے قافلہ کوئی بھی جاتا دیکھیے

لازمی ہے چشمِ نم میں جھلملاتا دیکھیے

 

کس طرح آتی ہے جنت کی بہاروں پر بہار

وجہِ حسن دو جہاں کو مسکراتا دیکھیے

 

یہ دلیلِ جشنِ میلاد النبی ہے، چار سو

قدسیانِ عرش کو پرچم لگاتا دیکھیے

 

جاننا گر چاہتے ہیں اختیارِ مصطفٰیٰ

اُمتی کو پُل پہ گرنے سے بچاتا دیکھیے

 

شانِ محبوبِ خدا ہے خوب، نَو، نَو مرتبہ

رویتِ دیدارِ حق کو آتا جاتا دیکھیے

 

مرجعِ ہر خیر ہے طیبہ کی یہ سیدھی سڑک

ہر گدا کو اُس گلی میں فیض پاتا دیکھیے

 

اُن کی خدمت پر کیا ہے رب نے مامور اس لیے

حضرتِ جبریل کو جھولا جھلاتا دیکھیے

 

حکم ہے لاترفعوا اصواتکم، تعمیل میں

بندۂ عشقِ نبی کو سر جھکاتا دیکھیے

 

آل و اصحابِ نبی پر بھیجیے ہر دم درود

منظرِ تاریک کو پھر جگمگاتا دیکھیے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ