اردوئے معلیٰ

Search

جِتنے بھی اِس جہان میں ذِی احترام ہیں

ہر ایک کے ہمارے محمد امام ہیں

 

اُن کی تو کوئی بات بھی حق ٹالتا نہیں

محبوبِ کبریا ہیں رسولِ انام ہیں

 

دنیا کے تاجدار بھی رکھتے ہیں سر جہاں

ہم بھی کرم سے بس اُسی در کے غلام ہیں

 

کون و مکاں کی رونقیں شمس و قمر کا نور

اِک اُن کی ذات کے لئے سب اہتمام ہیں

 

اللہ اکبر اُن کے درِ پاک کی عظمت

حاضر یہاں ملائکہ بہرِ سلام ہیں

 

جو ہو گئے ہیں نامِ شہِ دین پر نثار

زندہ اُنہیں کے آج زمانے میں نام ہیں

 

عشقِ رسول میں جو گزاریں گے زندگی

دنیا و آخرت میں وہی شاد کام ہیں

 

ہے طاعتوں کا لُطف تو اُن کے دیار میں

طیبہ کے دلنشین سجود و قیام ہیں

 

دونوں جہاں میں خیر سے مرزا وہ رہیں گے

جن کے لبوں پہ خوب درود و سلام ہیں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ