اردوئے معلیٰ

Search

حاصلِ کون و مکاں ہے آپ کی نوری گلی

مرکزِ ہر جسم و جاں ہے آپ کا اسمِ جلی

 

آپ کے شہرِ کرم کا ذکر ہو تو آن میں

حالتِ بیمارِ غم ہو جاتی ہے اچھی بھلی

 

وہ فلک کے پار بھی چاہے تو پل میں دیکھ لے

جس نے شہرِ ناز کی ہو خاک آنکھوں پر مَلی

 

چاروں یارانِ رسولِ ہاشمی ممتاز ہیں

حضرتِ فاروق بو بکر و غنی ، مولا علی

 

مرکزِ ایمان ہے وہ خاندانِ پنجتن

پھول ہیں حسنین جس کے سیّدہ جس کی کلی

 

دافعِ رنج و بلا ہیں ، قاسمِ ہر خیر ہیں

ان کے ذکرِ تام سے میری ہر اک مشکل ٹلی

 

رنگ بکھرے ، پھول نکھرے خلد پر آئی بہار

بادِ رحمت جب ترے شہرِ مدینہ سے چلی

 

حضرتِ حسنین کے صدقے ہے منظر ، قادری

خاک پائے غوثِ اعظم زیرِ سایہ ہر ولی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ