حرفِ اظہارِ عقیدت بہ زباں باندھا ہے
مصرعِ نعتِ شہِ ہر دو جہاں باندھا ہے
ایک بھی شعر تری شان کے شایاں نہ ہُوا
لاکھوں حرفوں میں زرِ حُسنِ بیاں باندھا ہے
اِک ترا خواب ہی آنکھوں میں سجایا ہے مدام
اِک ترا شوق ہی پلکوں میں رواں باندھا ہے
ہر نفَس رشتۂ توصیف سے ہے پیوستہ
مدحتِ شاہ کا ہر حرف بہ جاں باندھا ہے
کیف آور ہیں مرے سانس بہ امکانِ ثنا
مطربِ دل نے بھی کیا خُوب سماں باندھا ہے
بات بن جائے گی محشر میں کرم سے اُن کے
فردِ اعمال میں تو رختِ زیاں باندھا ہے
آمدِ نُور کے چرچے ہیں زمیں تا بہ فلک
نغمۂ شوق سرِ نوکِ زباں باندھا ہے
درگہِ شاہ میں مقصودؔ پئے عرضِ طلَب
دل نے الفاظ و معانی کا جہاں باندھا ہے
