اردوئے معلیٰ

Search

حکمِ خدا بھی دل کی صدا بھی درود ہے

روحانیت کی اصل غذا بھی درود ہے

 

آقا کی چاہتوں کا ہے زینہ درودِ پاک

اور چاہتِ نبی کا صلہ بھی درود ہے

 

مانا کہ وردِ صلے علیٰ ہے درود پر

ہر نسبتِ نبی کی حیا بھی درود ہے

 

ہاں ہاں اندھیری قبر کی ہے روشنی درود

محشر میں عافیت کی ردا بھی درود ہے

 

پڑھنا دعا میں اول و آخر درودِ پاک

حاجت روا خدا کی رضا بھی درود ہے

 

ورثے میں دے رہا ہوں فقط دولتِ درود

اپنے بڑوں سے مجھ کو ملا بھی درود ہے

 

نورِ شعور بھی ہے یہی وردِ جانفزا

بنجر زمینِ دل کی گھٹا بھی درود ہے

 

قربِ رسولِ پاک کا جو بھی ہے راستہ

اسکا شکیلؔ پہلا سِرا بھی درود ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ