خامۂ فدائے حمد بھی قربانِ نعت ہے
نطق و شعور و فکر کو ارمانِ نعت ہے
محشر تو ان کی شان کا ہے مقطعِ جلی
عالم تمام مطلعِ دیوانِ نعت ہے
ہے صدرِ بزمِ نعت بھی خود خالقِ جہاں
محبوبِ حق وہ شمعِ شبستانِ نعت ہے
ہر گُل میں ہر چمن میں محمد کا نُور ہے
وہ وجہِ کُل ہی حسنِ گلستان نعت ہے
آدم سے عیسٰی تک ہیں تمامی قصیدہ خواں
اللّٰہ کیا چنیدہ یہ ایوانِ نعت ہے
ہر اک زماں میں اسمِ محمد ہے جلوہ گر
ہر اک مکاں میں مہکا وہ بستانِ نعت ہے
سیرت سے مستنیر ہے ہر گوشۂ حیات
اک اک ادا حضور کی برھانِ نعت ہے
فکرو عمل بھی ساتھ ہوں لفظ و بیان کے
’’ہر شعبۂ حیات میں امکانِ نعت ہے‘‘
مدح و ثنائے خواجہ تو قرآں سے سیکھیے
راہِ غزل نہیں ہے یہ میدانِ نعت ہے
ناعت ہمارے عہد کے حاضر ہوئے تمام
عنوانِ نعت جب سے یہ امکانِ نعت ہے
روشن عدیم لفظ ہیں مقصودِ نعت کے
نُورِ جمالِ شاہ ہی فیضانِ نعت ہے
بوتا ہوں حرف حرف میں مدحِ نبی کی فصل
پیہم نزولِ موسمِ بارانِ نعت ہے
وارفتگی و بے بسی و خود سپردگی
میرے تو پاس بس یہی سامانِ نعت ہے
نوری مرے کریم کا کیسا کرم ہوا
میرا یہ حرفِ عجز بھی گلدانِ نعت ہے
