خاکِ دیار طیبہ جس دن سے مہرباں ہے
دشت وجود میرا صد رشک کہکشاں ہے
تذکار مصطفیٰ کے روشن ہیں چاند سورج
میرا جہان ہستی تاریک اب کہاں ہے
شاہ و گدا سب اپنے کشکول بھر رہے ہیں
دریائے لطف آقا پیہم گہر فشاں ہے
نعت شہ امم کو محدود کہنے والو !
دریا اسے نہ سمجھو یہ بحر بے کراں ہے
قدموں میں لوٹتا ہے یوں موسم بہاراں
حاصل ہمیں نبی کی زلفوں کا سائباں ہے
اے رحمت دو عالم رخ موڑ اپنی جانب
یہ اشہب تمنا جانے کدھر رواں ہے
ٹوٹی ہوئی چٹائی جس شاہ کا ہے بستر
محبوب کبریا ہے سلطان کن فکاں ہے
طیبہ میں چلتے پھرتے دیکھا ہے جس کو تم نے
ہاں میرا وہ پیمبر سیاح لامکاں ہے
کیوں ہنس رہے ہیں منظر کون آیا نور پیکر
سب ساعتیں ہیں روشن ہر لمحہ گل فشاں ہے
ممکن نہیں مرے گھر تیرہ شبی کا آنا
اسم شہ امم کا مہتاب ضو فشاں ہے
اے نورؔ مصطفیٰ کے نقش قدم کے صدقے
کہتے ہیں جس کو طیبہ فردوس بے گماں ہے
