اردوئے معلیٰ

Search

خیال تیرے دے راہیں وچھے عقیدتاں دے گلاب دے ساں

خدا جو میتھوں حساب لیسی میں نعت دی چا کتاب دے ساں

 

ترے وچھوڑے دے کھیت سوہنا کدی جے پانی دی لوڑ ہووے

سمھالی پھردے جو نین میرے میں روڑھ راوی، چناب دے ساں

 

میں روح دھاگے پرو لیا اے درود تیرا سلام تیرا

نکیر آ کے سوال کرسی نبی نبی دا جواب دے ساں

 

خدا نبی نوں ازل توں کہیا رضا مِری دا سوال ہوسی

جواب ہر اک ترے تے مُکسی میں جگ نوں انج دا نصاب دے ساں

 

غلاف کعبے دا رقص کرسی تے حور فن دی طواف کرسی

جدوں سخن دی پری دے مکھ تے میں نعت دا چا نقاب دے ساں

 

خدا کہیا اے تری وفا دا کفن جہناں نوں نصیب ہوسی

جہان کملے دی سوچ کملی میں رب انہاں نوں عذاب دے ساں

 

ادب توں اعجازؔ میری اکھ نوں نظارے جُھک کے سلام کر دے

خدائی بدلے کوئی جے منگے کدی نہ تیرا میں خاب دے ساں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ