اردوئے معلیٰ

Search

دل میں یادِ صنم ارے توبہ

کفر اور در حرم ارے توبہ

 

صبحِ خنداں کو دل ترستا ہے

ظلمتِ شامِ غم ارے توبہ

 

مے ہے ساقی ہے ابر ہے لیکن

توڑیں توبہ کو ہم ارے توبہ

 

زندگی کیا اسی کو کہتے ہیں

غم ہی غم، غم ہی غم ارے توبہ

 

بجھ نہ جائے چراغ یہ دیکھو

لو ہے ایماں کی کم ارے توبہ

 

دل کہ نازک سا آبگینہ ہے

اس پہ کوہِ الم ارے توبہ

 

زندگی کی نظرؔ مسافت کیا

بس یہی دو قدم ارے توبہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ