دَہن دَہن ترے غنچے، زباں زباں تری یاد
نظر نظر تری شبنم، فغاں فغاں تری یاد
سحر طلوع ہوئی ہے اس اہتمام کے ساتھ
دعا دعا تری خوشبو، اذاں اذاں تیری یاد
صدا و حرف کے خِطّوں میں سلطنت تیری
زمیں زمیں ترے نغمے، زماں زماں تری یاد
اَزل اَبَد کی لکیروں کی حد سے تُو باہر
جہاں جہاں کوئی سوچے، وہاں وہاں تیری یاد
حضور میں بھی جو ہیں عالمِ حجاب میں ہیں
یقیں یقیں تری ہستی، گماں گماں تری یاد
ترا مقام صدف میں، شفق میں، خوشبو میں
مکیں مکیں تری رونق، مکاں مکاں تری یاد
