رب درود آپ اوہنوں بھیجدا اے کہ میرے دل رُبا دی خیر ہووے
ساری دنیا تے چانن اوس دا اے صورتِ مصطفیٰ دی خیر ہووے
اوہدا چلنا تے بولنا رُکنا، اوہدا سوؤنا تے جاگنا ہے جو
سارا قرآن ایہو آکھدا اے اوہدی ہر ہر ادا دی خیر ہووے
اک یتیم آ گیا ہے عرشاں توں لاج رکھ لئی جنہیں غریباں دی
پا کے جھولی حلیمہؓ آکھدی اے میرے خیرالوریٰ دی خیر ہووے
فتح مکہ تے حکم ہویا سی کعبے تے چڑھ کے جا اذان دیو
تک کے سرکار نوں بلالؓ کہیا قبلۂِ حق نما دی خیر ہووے
سُکی روٹی ہے جوں دی اوہناں دی اک پیالہ ہے نال پانی دا
جسم تے ہِن نشان بورئیے دے فقر دے شہنشاہ دی خیر ہووے
جس نے محفل حضور دی کیتی، جس منایا میلاد آقا دا
رحمتاں ہون اُس دے گھر اُتے اوس دے اقربا دی خیر ہووے
سامنے دِس دی روضے دی جالی تے نظر وچ صحن حرم دا اے
سِر تے سایہ اے سبز گنبد دا، رحمتاں دی گھٹا دی خیر ہووے
میں تے منگتا ہاں اوہناں دے در دا میرا کوئی ہور آسرا ای نئیں
میں شہنشاہ مجیدؔ بن جاواں جے اوہ آکھن گدا دی خیر ہووے
