اردوئے معلیٰ

Search

زمین و آسماں اُس کے، مکان و لامکاں اُس کے

سمندر، کوہ و بن اُس کے، ہیں دریائے رواں اُس کے

 

اُسی کی سب ہوائیں، سب فضائیں، سب خلائیں ہیں

خزائن جتنے ہیں زیرِ زمیں، مخفی، نہاں، اُس کے

 

نگہباں ہے وہی سب کا، وہی سب کا محافظ ہے

سبھی معصوم بچے بھی، سبھی پیر و جواں اُس کے

 

وہی ہے خالقِ دنیا، وہی ہے مالکِ عقبیٰ

ملائک بھی سبھی اُس کے، سبھی ہیں اِنس و جاں اُس کے

 

اُسی کی شاہراہیں سب، ہر اک رستہ ڈگر اُس کی

سوئے طیبہ رواں جتنے ہیں، سب ہیں کارواں اُس کے

 

اُسی کا ذِکر ہر لمحہ، اُسی کی فکر ہر لحظہ

وظائف ہیں سبھی عُشاق کے وردِ زباں اُس کے

 

اُنھی کے واسطے سب کچھ بنایا حق تعالیٰ نے

ظفرؔ! محبوبِ یزداں ہیں وہ محبوبِ زماں اُس کے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ