اردوئے معلیٰ

Search

زندگی وقف ہے برائے نعت

اس لیے مجھ پہ ہے عطائے نعت

 

ایسی دنیا کی جستجو میں ہوں

ہر جگہ ہو جہاں فضائے نعت

 

سب لبوں پر ہے مصطفٰی کا نام

چل پڑی ہے یہاں ہوائے نعت

 

چشم کو تازگی کی نعمت دے

تلخیاں دل کی سب مٹائے نعت

 

آئینہ روح کا نکھرتا ہے

فکر سے گرد بھی ہٹائے نعت

 

مجھ پہ رحمت برسنے لگتی ہے

جب بھی کرتا ہوں ابتدائے نعت

 

کیا جلائے گا ہم کو یہ سورج

سر پہ موجود ہے ردائے نعت

 

جب وہ تشریف قبر میں لائیں

سب سے پہلے فدا سنائے نعت

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ