اردوئے معلیٰ

Search

زہے مقدر حضور حق سے سلام آیا ، پیام آیا

جھکاؤ نظریں ، بچھاؤ پلکیں ، ادب کا اعلیٰ مقام آیا

 

یہ کون سر سے کفن لپیٹے ، چلا ہے الفت کے راستے پر

فرشتے حیرت سے تک رہے ہیں یہ کون ذی احترام آیا

 

فضا میں لبیک کی صدائیں ، ز فرش تا عرش گونجتی ہیں

ہر ایک قربان ہو رہا ہے ، زباں پہ یہ کس کا نام آیا

 

یہ راہ حق ہے سنبھل کے چلنا ، یہاں ہے منزل قدم قدم پر

پہنچنا در پر تو کہنا آقا ، سلام لیجیے غلام آیا

 

یہ کہنا آقا بہت سے عاشق تڑپتے سے چھوڑ آیا ہوں میں

بلاوے کے منتظر ہیں ، لیکن نہ صبح آیا ، نہ شام آیا

 

دعا جو نکلی تھی دل سے آخر ، پلٹ کے مقبول ہو کے آئی

وہ جذبہ جس میں تڑپ تھی سچی ، وہ جذبہ آخر کو کام آیا

 

خدا تیرا حافظ و نگہباں ، او راہ بطحا کے جانے والے

نوید صد انبساط بن کر پیام دارالسلام آیا

 

زہے مقدر حضور حق سے سلام آیا ، پیام آیا

جھکاؤ نظریں ، بچھاؤ پلکیں ، ادب کا اعلیٰ مقام آیا

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ