اردوئے معلیٰ

Search

سخن کو نعت کے لمعات سے روشن کیے رکھا

شہِ ابرار کے نغمات سے روشن کیے رکھا

 

سرِ فہرست لکھا والضحی والشمس نُور اللہ

اور اپنا نطق ان آیات سے روشن کیے رکھا

 

کیا ہر بات کا آغاز ان کے نامِ عالی سے

اور اپنی بات کو اس بات سے روشن کیے رکھا

 

وہ سب لمحے جو شہرِ نور کی یادوں میں گزرے ہیں

ثنا کو ان حسیں ساعات سے روشن کیے رکھا

 

ضیاے نعت گوئی جو رضا کے در سے پائی ہے

سخن کو اپنے اس خیرات سے روشن کیے رکھا

 

ترے لمسِ قدم سے پائی جن ذروں نے تا بانی

فلک نے خود کو ان ذرات سے روشن کیے رکھا

 

ہمیں اُمید ہے منظر لحد میں روشنی ہو گی

کہ دل کو الفتِ سادات سے روشن کیے رکھا

 

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ