شعبِ احساس میں ہے نور فِشاں گنبدِ سبز
بحرِ صد رنگ ہے اور خُوب رواں گنبدِ سبز
سامنے آنکھوں کے ہے اور نہیں آنکھوں میں
ایک امکاں ہے کہ ہے جذبِ نہاں گنبدِ سبز
ویسے تو ہوتے ہیں تغییر طلب سبزہ و گُل
ایک گُل ہے کہ نہیں خوفِ خزاں گنبدِ سبز
دیدۂ خواب میں اِک حُسن کا عنواں جیسے
پیکرِ شوق میں ہے روحِ رواں گنبدِ سبز
ویسے تو حرف نے کھینچی نہیں تمثیلِ جمال
ہے مگر رشک گہِ طُور و جناں گنبدِ سبز
صحنِ مسجد میں جہاں بیٹھیں اسے ہی دیکھیں
محورِ دیدہ و دل کنجِ عیاں گنبدِ سبز
پاسِ آدابِ مواجہ تو ہے اِک ضبط، مگر
بعد میں سنتا ہے سب آہ و فغاں گنبدِ سبز
ایک لمحے کو تو خود حرفِ طلب چیخ اُٹھا
مَیں کہاں، دید کہاں اور کہاں گنبدِ سبز
آؤ مقصود مدینے کو چلیں درد نصیب
اب تو بس ایک ہی ہے جائے اماں گنبدِ سبز
