شگفتہ ہے گُلِ امکانِ رحمت
تعلق آپ سے ہے جانِ رحمت
سدا سر سبز ہیں گُلہائے مدحت
مہکتا ہے سدا گُلدانِ رحمت
بروزِ حشر اُن کے اُمتی کا
سہارا ہے ، فقط پیمانِ رحمت
اسی در سے ملا ہے عارفوں کو
شعورِ زندگی ، عرفانِ رحمت
گروہِ انبیاء میں منفرد ہے
تری شانِ شفاعت ، شانِ رحمت
ترا دستِ سخا ، جانِ سخاوت
تری چشمِ عطا ، ایمانِ رحمت
مرا شوقِ سخن میرا اثاثہ
تری مدح و ثنا ، عُنوانِ رحمت
مرے سب عیب چُھپ جاتے ہیں اخترؔ
خوشا! یہ وُسعتِ دامانِ رحمت
