اردوئے معلیٰ

Search

عاشق ہوا ہے جس کا وہ خالق علی الخصوص

کیوں کر نہ ہو سبھی میں وہ فائق علی الخصوص

 

آدم تھا آب و گِل میں ولیکن نبی کا نور

پیدا ہوا ہے کُل سے وہ سابق علی الخصوص

 

شانِ نبیِ پاک کو دیکھو تو غور کر

خالق تھا جس کے ساتھ بھی ناطق علی الخصوص

 

جوں نورِ شمع شمع سے اور شمع نور سے

ہے حق نبی سے اس طرح شارق علی الخصوص

 

امت کی مغفرت کا رسولِ کرام نے

حق سے لیا ہے وعدۂ واثق علی الخصوص

 

ہوتے ہیں سب مرید خدا و رسول کے

لیکن ہے ایک لاکھ میں صادق علی الخصوص

 

برہاں کی التجا ہے یہی ذوالجلال سے

دل سے نبی کا میں رہوں شائق علی الخصوص

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ