اردوئے معلیٰ

Search

عیاں تو ہونی ہی تھی عظمتِ حضور ضرور

زماں زماں نظر آنا تھا اُن کا نور ضرور

 

محمدِ عربی رحمتِ ہر عالم ہیں

ہر اُمتی کو بھی ہونا ہے شر سے دور ضرور

 

نبی کی ذات سے وابستگی ضروری ہے

ملے گا نعت نگاری کا بھی شعور ضرور

 

ہو میرا حشر بھی مدحت گزار لوگوں میں

حضور ! آپ جو کہہ دیں وہاں ضرور ضرور

 

ضرور خواب مری نیند کو سنواریں گے

نگاہ خواب میں دیکھے گی اُن کا نور ضرور

 

اگرچہ دشمنِ دینِ محمدی ہے قوی

غمیں نہ ہو کہ یہ پھیلے گا نزد و دور ضرور

 

زمانہ دینِ محمد پہ لوٹ آئے گا

مٹیں گے قریۂ ہستی سے سب شرور ضرور

 

فراقِ طیبہ میں تلقینِ صبر لاکھ سہی

عزیزؔ! دل کو تو ہونا ہے ناصبور ضرور

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ