اردوئے معلیٰ

Search

مجھے دنیا کے رنج و غم نے مارا یا رسول اللہ

خدارا اپنی رحمت کا اشارہ یا رسول اللہ

 

تمہاری دید ہو جائے تو میری عید ہو جائے

رُخِ انور دکھا دو پیارا پیارا یا رسول اللہ

 

مری کشتی بھنور میں گِھر چُکی ہے نا خدا آؤ

کرم سے مجھ کو مل جائے کِنارا یا رسول اللہ

 

کُھلے گا ہی نہیں بابِ شفاعت حشر میں ہرگِز

نہ ہوگا آپ کا جب تک اشارہ یا رسول اللہ

 

گدا ہو کر تمہارا نارِ دوزخ میں چلا جاؤں

نہ ہو گا یہ تمہیں ہرگز گوارا یا رسول اللہ

 

عدو کا کام ہے جلنا جلیں وہ ہم کو کیا لینا

لگاتے ہی رہیں گے ہم یہ نعرہ یا رسول اللہ

 

مجھے حسنین کے صدقے میں اِک ٹکڑا عطا کر دو

سگِ دربار ہے مرزا تمہارا یا رسول اللہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ