اردوئے معلیٰ

Search

محبوب کی قربت میں محب کا بھی پتہ ڈھونڈ !

اے ڈھونڈنے والے تو مدینے میں خدا ڈھونڈ !

 

برسے گا ابھی ابرِ کرم کشتِ سخن پر

اس زلف کے مضمون کو اے فکرِ رسا ! ڈھونڈ

 

لے ! ظِلِّ رفعنا میں ترفّع کی ہوائیں

سرکار کی سیرت میں ترقی کا پتہ ڈھونڈ

 

غم کی ہے کہیں دھوپ ، بلا کی کہیں گرمی

آ ! سایۂِ توصیف میں ، رحمت کی ہوا ڈھونڈ !

 

کر ذکر ذرا چشم و لب و زلف و دہن کا

یوں رمز و گل و ابرِ سخا ، آبِ شفا ڈھونڈ !

 

ہو جائے گی پر نور شبِ ظاہر و باطن

ظلمت زدۂِ دہر ! مہِ حرفِ ثنا ڈھونڈ

 

اے زینتِ دنیا کی خزاؤں سے بِلکتے !

’’ جنت کی بہاروں کا مدینے میں مزہ ڈھونڈ ‘‘

 

بیدِل کی طرح جدتِ معنٰی بھی ہے لازم

افکار میں ندرت کو معظمؔ ! تو سدا ڈھونڈ !

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ