مدینہ سجدہ گاہِ عشق و مستی
مدینہ رفعت و توقیرِ ہستی
مدینہ نازشِ انوارِ عالم
مدینہ حسن کی تابندہ بستی
مدینہ سائبانِ عفو و رحمت
مدینہ تشنگی میں جامِ فرحت
مدینہ ہے ضمانت عافیت کی
مدینہ بخشے ہر ذرے کو ثروت
مدینہ مرکزِ امن وسکوں ہے
مدینہ محورِ شوق و جنوں ہے
مدینہ پیرہن ہے شفقتوں کا
مدینہ مرہمِ زخمِ دروں ہے
مدینہ رب کی عظمت کی نشانی
مدینہ روشنی اور شادمانی
مدینہ ہے کرم گاہِ غریباں
مدینہ ہے بھرم گاہِ غلامی
مدینہ بارگاہِ رب کا زینہ
مدینہ آخرت کا ہے خزینہ
مدینہ ساحلِ رنج و مصائب
مدینہ ہے پناہِ ہر سفینہ
مدینہ دلکشی ٹھنڈک چراغاں
مدینہ ہر گھڑی پُرنور و تاباں
مدینہ دانش و حکمت کا مرکز
مدینہ ہے کھلی تفسیرِ قرآں
مدینہ نور و نکہت کا خزانہ
مدینہ رفعتوں کا آشیانہ
مدینہ ہے درِ انعام ہر دم
مدینہ بس کرم کا آستانہ
مدینہ بانٹتا ہے چاہتیں بھی
مدینہ دے رہا ہے عزتیں بھی
مدینہ ہے علاجِ دردِ عصیاں
مدینہ سب مٹائے اُلجھنیں بھی
مدینہ ناز گاہِ ہر پیمبر
مدینہ شوکتِ شاہ و گداگر
مدینہ تو عروجِ سرمدی ہے
مدینہ حیرتوں کا اِک سمندر
مدینہ آرزوئے زندگی بھی
مدینہ آبروئے بے بسی بھی
مدینہ ہے شکیلؔ اِک خُلدِ ارماں
مدینہ عشق کی بارہ دری بھی
