مکان و لا مکاں میں کچھ نہیں ہے
نہ ہوں گر وہ جہاں میں کچھ نہیں ہے
انہی کے در پہ آنکھوں کو بچھاؤ
کسی غیر آستاں میں کچھ نہیں ہے
نبی کی نعت گوئی ہے تعارف
تخیّل کے بیاں میں کچھ نہیں ہے
توجہ سے انہی کی لکھ رہا ہوں
مرے فہم و گماں میں کچھ نہیں ہے
مری چشمِ محبّت کہہ رہی ہے
’’بجز رحمت جہاں میں کچھ نہیں ہے‘‘
وسیلہ ان کا ہے میرا سہارا
مری آہ و فغاں میں کچھ نہیں ہے
انہی کی نسبتوں نے ہے سنوارا
کہ زاہدؔ کے بیاں میں کچھ نہیں ہے
