میری آنکھوں میں بسا ہے آج بھی بابُ السّلام

میری آنکھوں میں بسا ہے آج بھی بابُ السّلام

کُو بہ کُو پھیلا رہا ہے روشنی بابُ السّلام

 

مسجدِ آقا میں مغرب کی طرف موجود ہے

آیتوں سے ہے مزّین خوش خطی بابُ السّلام

 

جب مواجے کی طرف آتے ہیں اس کی سمت سے

بس اُسی دم دیکھ آتے ہیں سبھی بابُ السّلام

 

اللہ اللہ ہر زمانے میں نرالی شان سے

دے رہا ہے درسِ امن و آشتی بابُ السّلام

 

اس کی بائیں سمت ہی میں بابِ یارِ غار ہے

پا گیا واللہ اُس پر برتری بابُ السّلام

 

مسجدِ آقا خدا رکھّے تجھے تا بہ ابد

تیری نسبت سے ہوا ہے جنتی بابُ السّلام

 

جس کو اکثر دیکھتا رہتا تھا خاکیؔ ہر گھڑی

گھومتا ہے اس کی نظروں میں وہی بابُ السّلام

 

(مسجد نبوی کا بابُ السّلام)