میرے مقصودِ نظر ہیں وہ نگارِ زندگی
جن کا خود مشتاق ہے پروردگارِ زندگی
حِلم و عفود دَر گزر کا ایک نقشِ دل نواز
وہ کہ جن پر خود ہے نازاں نقش کارِ زندگی
حُسن تہذیب و تمدن جلوہ احسان و عدل
شہرِ عِلم و دانش و حکمت ، وقارِ زندگی
پیکر لطفِ عمیم و مظہر خلقِ عظیم
وہ کہ جن کی ہر ادا ہے اعتبارِ زندگی
شاہدِ عادل ہے اس پر آیۂ شقُ القمر
اُن کے ایمائے نظر پر ہے مدارِ زندگی
صاحبِ لولاک ، روحِ خلقتِ ارض و سما
ان کی ہستی باعثِ نقش و نگارِ زندگی
اُن کی یاد ، اُن کے تصور ، اُن کے ذکرِ خیر سے
بن گیا ہے تختہ گل ، ریگ زارِ زندگی
