اردوئے معلیٰ

Search

میں ، مری آنکھیں ، تمنائے زیارت ، روشنی

خواب ، شہرِ مصطفیٰ ، صبحِ سعادت ، روشنی

 

خواہشِ قلب و نظر ، زیبائشِ قلب و نظر

ایک روشن شہر جس کی وجہِ شہرت روشنی

 

یہ مرا ایمان ہے ، ہر روشنی سے پیشتر

چاہتی ہے رُوئے انور سے اجازت روشنی

 

جس نے سب تاریک راہوں میں اُجالا کر دیا

زندگی کے ہر سفر میں اُن کی سیرت روشنی

 

اُن کی رحمت پر ہمیں کامل بھروسا ہے اگر

خواب ہیں سارے اندھیرے ، اک حقیقت روشنی

 

جگمگا اُٹھا مرا ماحول نُوری وِرد سے

زیرِ لب "صلِ علیٰ احمد” کی کثرت ، روشنی

 

شعر میں اُس حُسن کی تعریف ، قصہ مختصر

نور ہے روئے منور ، قد و قامت روشنی

 

سب زمانوں کو ضرورت ہے ترے پیغام کی

سب زمانوں کے لیے ہے اک ضرورت روشنی

 

ماضی و موجود اُن کے نقشِ پا سے مُستنیر

شہرِ استقبال میں اُن کی بدولت روشنی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ