ندیمِ مصطفیٰ صدیقِ اکبر
ہمارے پیشوا صدیقِ اکبر
سنا ہے جب سے لا تحزن نبی سے
غموں سے ہیں رہا صدیقِ اکبر
یہ ہجرت کی رفاقت کہہ رہی ہے
ہیں معراجِ وفا صدیقِ اکبر
مہک اٹھا چمن زارِ تمنا
کہا جب میں نے یا صدیقِ اکبر
حبیبہ سرورِ کونین کی ہے
تمہاری عائشہ صدیقِ اکبر
خشیت، عاجزی ، تقوی ، اطاعت
ادب کی انتہا صدیقِ اکبر
سفینہ کیوں بھلا وہ ڈگمگائے
ہوں جس کے ناخدا صدیقِ اکبر
ہدایت کا ہے خورشید درخشاں
ترا ہر نقشِ پا صدیقِ اکبر
مکمل عکس ہے جس میں نبی کا
ہیں ایسا آئنہ صدیقِ اکبر
بڑی آسودگی سے جی رہی ہوں
کرم یہ ہے ترا صدیقِ اکبر
قیامت میں بھرم رکھنا ہمارا
برائے مصطفی صدیقِ اکبر
مرا پیرایۂ اظہار بدلے
ملے صدقہ ترا صدیقِ اکبر
تمنا ہے صدف لکھے قصیدہ
ترے اوصاف کا صدیقِ اکبر
