اردوئے معلیٰ

Search

(کتبِ شمائل میں ہے کہ حضور ’’ طویل السکوت ‘‘

یعنی تادیر خاموش رہنے والے تھے ) بطور ردیف نظم

 

نطقِ حق تیری بات اے طَویلُ السُّکوت !

خامشی سرِّ ذات اے طویل السکوت!

 

افصحِ خَلق ! مصدر بلاغت کا ہے

آپ کی بات بات اے طویل السکوت!

 

عالِمِ واجب و ممتنع ! آپ ہیں

مالکِ ممکنات اے طویل السکوت!

 

دے رہا ہوں تِری یاد کی فوج سے

لشکرِ غم کو مات اے طویل السکوت!

 

تیرے گیسوئے مشکیں سے ہیں فیضیاب

یہ گھٹا ، مُشک ، رات اے طویل السکوت !

 

ہو مِری گفتگو مختصر اور مفید

لغو سے دے نجات ! اے طَویلُ السُّکوت !

 

ہوں عطا مجھ کو روزانہ اشعارِ نعت

کم سے کم پانچ سات اے طَویلُ السُّکوت!

 

روزِ محشر معظمؔ کے غیرِ ثنا

نہ کھلیں پرچہ جات اے طَویلُ السُّکوت !

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ