اردوئے معلیٰ

Search

نعت خود مہکے گی پھر انفاس تک

لے تو آوٗں مَیں اُسے احساس تک

 

اور کیا مانگیں سخی کے شہر میں

ایک حاجت بھی نہیں ہے پاس تک

 

پُورا قُرآں مدحتِ ممدوحِ کُل

دیکھیے الحمد سے والنّاس تک

 

حوض پر جائیں گے اُن کو دیکھنے

دیکھتی رہ جائے گی پھر پیاس تک

 

تذکرہ کیا اُس گلی کی شان کا

سنگریزے ہوں جہاں الماس تک

 

وہ اجازت نعت کی جب تک نہ دیں

یہ قلم آتا نہیں قرطاس تک

 

اُن کی رحمت کا تعیّن، الاماں

ٹُوٹ جاتا ہو جہاں مقیاس تک

 

نعت کا یہ کیا عجب فیضان ہے

فکر میں رہتا نہیں افلاس تک

 

قبلۂ اہلِ یقیں ہے حُر کی ذات

اور ہے اوجِ وفا عبّاس تک

 

دل اگر بے خود ہُوا تو کیا ہُوا

چومتا ہے یہ زمیں آکاس تک

 

پہلے ہی مقصودؔؔ بن جاتی ہے بات

بات جاتی ہی نہیں ہے یاس تک

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ