نورِ عرفاں نازشِ پیغمبری اُمّی نبی
سر بسر دیوانِ علم و آگہی اُمّی نبی
علم کے سورج بھی محتاجِ ضیا ہیں آپ کے
عقلِ کل بھی ہے سوالی آپ کی اُمّی نبی
آپ کے تلوؤں کا دھوون ہر بصیرت کا جمال
آپ ہی کے دم قدم سے روشنی اُمّی نبی
کھل گئے فکر و نظر میں سینہِ فطرت کے راز
مٹ گئی سارے جہاں سے تیرگی اُمّی نبی
انشراح و ارتقا کے سر پہ بھی رکھیں قدم
ان کو بھی تو چاہیے نا رہبری اُمّی نبی
رفعتِ افکار پر ہر برتری کے تاج پر
ہے ترے منشور کی جلوہ گری اُمّی نبی
ہے کسے ادراکِ عظمت کون ہمسر ہے یہاں
زیرِ پائے ناز ہر اِک سروری اُمّی نبی
بس یہی نعرہ لبِ دانشوری پہ ہے شکیلؔ
سیّدی و مرشدی اُمّی نبی اُمّی نبی
