اردوئے معلیٰ

Search

نورِ کون و مکاں یا شہِ انبیاء

زیبِ عرش و جناں یا شہِ انبیاء

 

حامئ بے کساں یا شہِ انبیاء

راحتِ عاشقاں یا شہِ انبیاء

 

نورِ ربّ العلیٰ بات وحئ خدا

نام ہے مصطفیٰ یا شہِ انبیاء

 

آپ کے ذکر کا بول بالا ہُوا

واہ رِفعتِ شاں یا شہِ انبیاء

 

چاند ٹکڑے ہُوا خور اُلٹا پھرا

خوب تاب و تواں یا شہِ انبیاء

 

آپ کے واسطے حق نے پیدا کیے

یہ زمین و زماں یا شہِ انبیاء

 

دیکھ کر خُلق کو غیر بھی ہوگئے

آپ کے قدر داں یا شہِ انبیاء

 

ہر خفی و جلی فضلِ سُبحان سے

آپ پر ہے عیاں یا شہِ انبیاء

 

میں گنہگار ہُوں سخت لاچار ہُوں

آپ ہیں مہرباں یا شہِ انبیاء

 

پھر کرم کیجئے آکے میں دیکھ لُوں

آپ کا آستاں یا شہِ انبیاء

 

ہم سے کیا ہو سکے جب کہ رب خود کرے

شان و رِفعت بیاں یا شہِ انبیاء

 

دل سے مدح کرے اپنے مرزا کو دے

وہ قلم وہ زباں یا شہِ انبیاء

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ