اردوئے معلیٰ

Search

نگاہوں میں چمکتا ہے یہ منظر سبز گنبد کا

مرے دل میں دمکتا ہے یہ منظر سبز گنبد کا

 

بہارِ جاں فزا کہیے نگارِ دل ستاں کہیے

خیالوں میں مہکتا ہے یہ منظر سبز گنبد کا

 

ریاضِ جاں میں کھلتے ہیں حسیں موسم گلابوں کے

بہشت آثار لگتا ہے یہ منظر سبز گنبد کا

 

خدا کے نور کے جلوے فرازِ طور کے لمعے

بہ ہر لحظہ نکھرتا ہے یہ منظر سبز گنبد کا

 

طلوعِ فجر کا منظر جہاں بھر سے سہانا ہے

عجب صورت سنورتا ہے یہ منظر سبز گنبد کا

 

مہک اُٹھتی ہے جذبوں سے حرائے جاں کی تنہائی

بصد نکہت اُبھرتا ہے یہ منظر سبز گنبد کا

 

سرورِ قلب و سینہ ہے تجلّی ان فضاؤں کی

قرارِ جاں ٹھہرتا ہے یہ منظر سبز گنبد کا

 

جھڑی آنکھوں سے لگتی ہے گنہ کے میل دھلتے ہیں

کرم بن کر برستا ہے یہ منظر سبز گنبد کا

 

اسی کی چھاؤں میں نوری پیامِ موت آ جائے

کہ دل بن کر دھڑکتا ہے یہ منظر سبز گنبد کا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ