وصل کو بھی نارسائی میں بدل ، خاموش باش
یہ مدینہ ہے یہاں حیرت میں ڈھل ، خاموش باش
ساعتِ آخر میں آنا ہے انہیں بہرِ کرم
ایک لمحے کو سہی لیکن اجل ! خاموش باش
تُو جو الجھا ہُوا نُور و بشر کی بحث میں
یہ تری عقلِ زیاں کا ہے خلل ، خاموش باش
اُس درِ نازک پہ کس کو ہے مجالِ دَم زدن
لڑکھڑاتے شوقِ بے خود ! اب سنبھل ، خاموش باش
چل جہاں کچھ حاجتِ عرضِ نیازِ دل نہیں
خود کلامی ! منزلِ تسکیں کو چل ، خاموش باش
کار سازی کو بہت ہے بس خیالِ کار ساز
مشکلیں بے عرضِ غم ہوتی ہیں حَل ، خاموش باش
اُن کی مرضی کے مُکلف ہیں طلب کے سلسلے
اے مرے شوقِ ابد ، جذبِ ازَل ! خاموش باش
وہ خبر رکھتے ہیں پہیم گریۂ احساس کی
کرب یابِ ہجرِ وارفتہ علل ، خاموش باش
شافعِ محشر پہ ہے مقصودؔ بخشش کا مدار
جانتے ہیں وہ تری فردِ عمل خاموش باش
