اردوئے معلیٰ

Search

وہاں مصطفی کو بلایا گیا

جہاں اور کوئی نہ آیا گیا

 

مرے دل کی خوش بختیاں دیکھیے

اسے نعت سے جگمگایا گیا

 

بصارت کو معراج حاصل ہوئی

نبی جی کا روضہ دکھایا گیا

 

دو عالم کے والی کے دربار میں

غریبوں کا رتبہ بڑھایا گیا ۔

 

مرا اس وسیلے پہ ایمان ہے

مجھے ہر غمی سے بچایا گیا ۔

 

جہاں دشت میں امتی تھے وہاں

کرم والا خیمہ لگایا گیا

 

درودوں کی خوشبو کی ترسیل کو

دہن والا غنچہ کھلایا گیا

 

جہاں موجِ سرکش مقابل ہوئی

وہیں ہم کو ساحل دکھایا گیا

 

زمیں پر جو جنت مدینے میں ہے

مجھے بھی وہیں پر بٹھایا گیا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ