وہ رسولِ محترم عزت مآب
ہر زمانے کا وہی ہیں انتساب
جگمگاتے ہیں نبی کے نور سے
سب شہاب و ماہتاب و آفتاب
کائناتِ حسنِ کا صیغہ ہیں آپ
آپ کے دم سے ہے ساری آب و تاب
مصرعِ نعتِ نبی ہے زندگی
ہر دگر صنفِ سخن سے اجتناب
ہیں معطر زلفِ نم کے فیض سے
لالہ و نرگس ، بنفشہ اور گلاب
گنبدِ سر سبز میرے شوق کا
رنگ و بو کے اِس جہاں میں انتخاب
زندگی ہر چار جانب ہے رواں
آپ کے فیضان کا ہے اکتساب
لیں ردائے خیر میں آقا مجھے
کر رہا ہو محتسب جب احتساب
بر وسیلہ آل و اصحابِ نبی
بخش دے منظر کو مولا بے حساب
